पुनरावेदन अदालत पोखरामा मेलमिलाप केन्द्र

पोखरा, २२ फागुन
मुद्दाको चाप न्यूनीकरण गर्दै न्याय सहज र र्सवसुलभ बनाउन पुनरावेदन अदालत पोखरामा मेलमिलाप केन्द्र स्थापना गरिएको छ । सो मेलमिलाप केन्द्रको सर्वोच्च अदालतका न्यायधीश दामोदरप्रसाद शर्माले शुक्रवार उद्घाटन गर्नुभयो । हाल देशका २२ अदालतमा मेलमिलाप केन्द्र स्थापना भइसकेको छ । पाँच वर्षभत्रै ७५ वटै जिल्लाभित्र मेलमिलाप केन्द्र स्थापना गर्ने लक्ष्य रहेको सर्वोच्च अदालतका सह-रजिष्ट्रार श्रीकान्त पौडेलले बताउनुभयो । त्यसका लागि बजेट विनियोजन भइसकेको पनि उहाँले जानकारी दिनुभयो ।कास्की जिल्ला अदालतमा रहेको मेलमिलाप केन्द्रमा ३६ वटा मुद्दा पठाइएकोमा तीन वटाको छिनोफानो भएको सो अवसरमा जानकारी दिइयो । उद्घाटन कार्यक्रममा न्यायधीश दामोदर शर्माले मुद्दाको निर्णय एउटाले जित्ने अर्को हार्ने हुँदा मुद्दाले अर्को मुद्दा जन्माउँछ तर मेलमिलापमा दुवै पक्षले जित्ने भएकोले समय, श्रम र पैसाको वचत हुन्छ भन्नुभयो । मुद्दा हैन मेलमिलाप गर भन्ने मान्यताका साथ मेलमिलाप केन्द्र विस्तार गरिँदै लगिने उहाँले बताउनुभयो । कार्यक्रममा क्षेत्रीय प्रशासक अर्जुनबहादुर भण्डारी, सर्वोच्च अदालत बार इकाइका अध्यक्ष इन्द्र खरेल र पुनरावदेन अदालत पोखरा बार इकाइका कार्यवाहक अध्यक्ष बोधराज बरालले मेलमिलाप केन्द्रको महत्वबारे भन्नुभयो ।