मनाङ मर्स्याङदी सेमिफाइनल भिडन्त पुलिससित

पोखरा, १८ माघ
पोखराको मैदानमा उत्रिएको एन्फा यु १६ को टोलीलाई मनाङ मर्स्याङदीले ४-१ गोलले पराजित गर्दै सेमिफाइनलमा पुरानो प्रतिद्धन्द्धी नेपाल पुलिसक्लबसित भिड्ने पक्का गरेको छ । मनाङ मर्स्याङदी आठौं आहा गोल्डकपको सेमिफाइनलमा प्रवेश गर्दा रातारात पोखरा उत्रिएर मैदानमा छिरेको यु १६ टोलीलाई पोखरेली दर्शकको साहनुभूति लिएर फर्कियो ।ढाका स्पोर्टिङ क्लब बंगलादेश अनुपस्थित भएपछि सहारा क्लबले एन्फाको यु १६ टोलीलाई मध्यरातमा खबर गरेर पोखरा मैदानमा उतारेको थियो । राती एघार बजे काठमाडौंबाट आहा गोल्डकप खेल्न विहान चारबजे पोखरा आइपुगेको यु १६ ले अपेक्षाकृत खेल प्रदर्शन गर्न भने सकेनन् ।
सधै मनाङ मर्स्याङदीलाई र्समर्थन गर्दै आएका पोखरेली दर्शकले सोमबार भने एकाएक एन्फा यु १६ को पक्षमा देखिएका थिए । कलिलो युवा जोशलाई दर्शकको र्समर्थनले उर्जा थपेपनि आशातित खेल प्रदर्शनको अभावमा दर्शकहरुमा खेल सकिन आधा घण्टा अगावै प्यारापिट छाडिसकेका थिए ।यु १६ टोलीको गोलपोष्टमाथि निरन्तर प्रहार गरेको मनाङले खेलको २८ औं मिनेटमा आइपुग्दा सफलता प्राप्त गर्यो । मैदानको मध्यभागमा पाएको फ्रीकिकलाई दिपक भुषालले गोल गरेपछि मनाङ जोसिला युवामाथि हावीहुन शुरुभएको थियो । त्यसको दुइ मिनेट लगत्तै ३० औं मिनेट शिव श्रेष्ठले रितेश मल्लको पासमा गोल गर्दै पहिलो हाफ शुन्यका विरुद्ध दुइले अग्रता लिएको थियो ।खेलको ५० औं मिनेटमा यु १६ को टोली गोल गर्दा दर्शकले हौसला थपेका थिए । हेम तामाङले गोलकिपर अगाडि बढेको अवस्थामा हानेको बल सिधै पोष्टभित्र छिरेपछि खेल निकै प्रतिस्पर्धात्मक हुने अपेक्षा गरिएको थियो । निरन्तर आक्रमणको रणनीतिमा उत्रिएको मनाङ मर्स्याङदीले ७० औं मिनेटमा निरजरेमी मगरको पासमा सुजल श्रेष्ठले गोल गर्दै अग्रता तेब्बर बनाए भने म्यान अफ दि म्याच शिव श्रेष्ठले ७३ औं मिनेटमा व्यक्तिगत दोस्रो गोल गर्दै सेमिफाइनलको यात्रा पक्का बनाए ।